LOU MANESCAU

Ennegresi mai qu'un darboun
Pèr la sujo e pèr lou carboun,
Pin-pan, pin-pan, pin-pan ! lou manescau martello,
Sus l'enclume que resclantis,
Soun ferre. L'ataié s'emplis
D'un orre gisclamen de belugo e d'estello.

Dirias alor qu'un serpentèu
Fuso dessouto lou martèu.
Pin-pan, pin-pan, pin-pan ! Dins sis usso espessido
En mato de baucas, vesès
Plòure uno raisso ardènto ; ausès
Pèr moumen cresina sa barbo esgarrussido.

Suso lou negre manescau,
En tabasant soun ferre caud.
Pin-pan, pin-pan, pin-pan ! L'encro raio e davalo,
A degout, de si bras muscla,
De si gaugno e soun front uscla,
Sus soun pitre pelous coume un dessus de malo.

Que dounara travai tant fèr ?
Que sourtira d'aquest infèr ?
Pin-pan, pin-pan, pin-pan ! Finido es la besougno.
De-qu'es ? -- Un ferre pèr caussa
La bato d'un ase, estrassa,
Devouri de vermino e pela pèr la rougno.

Iéu, peréu, de moun franc mestié,
Siéu manescau : sus lou papié,
Cri-cra, cri-cra, cri-cra ! martelle la pensado.
La plumo douno li bacèu
Sus la pajo, e dins lou cervèu
Beluguejo lou fiò de la forjo abrasado.

E trime dur, tout encouca
Pèr l'idèio, tout ensuca.
Cri-cra, cri-cra, cri-cra ! La plumo es pas saussado
Dins l'encro soulamen. Oh ! noun !
A moun avis acò's pas proun :
D'un tros ensaunousi de l'amo es amoursado.

Couprenes, galoi coumpagnoun,
Coume vous roump closco e rougnoun,
Cri-cra, cri-cra, cri-cra ! la folo farandoulo
De l'idèio dins lou cervèu
Pèr espeli de soun cruvèu ?
Ta forjo a rèn de tau pèr gausi li mesoulo.

Pela, galous mai que lou tiéu
Counèisse un ase ; acò's lou miéu
Cri-cra, cri-cra, cri-cra ! la pajo se mascaro
Pèr lou tira d'un marrit mau
Que n'en fai lou pire animau.
Pèr rougno a lou nescige, e n'es pas tout encaro.

A lou nescige, moun roussin ;
A dins la visto un agacin
Dur, espés, verinous, pesoulino de l'amo,
Que rousigo mai que la pèu.
Fau lou tira d'aqui lèu-lèu,
Fau, dins soun tenebrun, faire lusi la flamo.

Bèn que raporte pas sèmpre soun tros de pan,
Es obro de valour, parai, negre coupaire ?
De-longo faguen dounc, chascun dins noste caire,
Iéu pèr l'ome cri-cra, tu pèr l'ase pin-pan.

Joan Enric Fabre
Arrenjaments ortografics dau Caramentrant