LOU VERBOUISSET

Verbouisset coumpagnoun di mato ensouleiado,
Verbouisset superbe rampau
De la co-rousso e dóu rigau,
Que porton, coume tu, coulour de flamejado ;
O cerieso de pastre, o glòri de l'ivèr
Pèr ti poumeto roujo e toun fuiage verd !

Siés prim, mai siés lou fort. Quand la fèro cisampo
En escoubant li coutau rous,
Fouito lou chaine pouderous ;
Quand l'eissame jala dóu nivoulas s'escampo
E clino de soun fais l'óulivié palinèu,
Tu, roubuste cepoun, rises souto la nèu.

Espinches, tranquilas au founs de la baragno,
Amalugado pèr lou pes
E la fre d'un couglas espés
Que toumbo en candeleto e de si plour te bagno ;
Alor, requinquiha, mai lou mistrau brusis,
Mai verdoulejes, mai toun courau trelusis.

Siés lou fort. Sus la tepo, entrevadis e bauco,
Argelèbre sus li roucas,
Dins la palun sagno e jouncas,
Barrulon, cousseja pèr l'alenado rauco
Qu'a plen boufet toussis janvié l'endoulouri,
Lou jala ; tu, soulet, alor auses flouri.

Ti floureto à sièis rai, souto fueio espelido,
Verdalo emé l'iue cremesin,
Dounon soulas au seresin,
Que tafuro, afama ; la pauro anequelido,
La petouso li vèi, repren courage e dis :
"Tirit ! tout es pas mort dins l'orre chapladis."

"Reveirai ma téulisso e moun nis fa de mousso.
Aquéu flouris, dounc lou soulèu
Amoussara pas soun calèu.
Es verai ço que m'an di lou rigau, la co-rousso :
Tant que lou verbouisset tendra soun pecou dre,
Mignoto, agues pas pòu, risques rèn de la fre."

Siés lou bouissoun sacra. Quand, pèr Nouvè, se pauso
Cacho-fiò, joio de l'oustau,
Dreissa sus lou pan calendau
Entre quatre candèlo, un plat de cacalauso,
Un gréu d'àpi, uno anchoio em'un tros de nougat,
Sus uno assieto bluio en d'oustìo plega,

Fas piéuta l'enfantoun e rire la ninèio ;
Fas apensamenti li vièi
Que chourlon un chiquet, e pièi,
La calour dóu vin cue revihant lis idèio
Au founs de l'esperit, pèr lis an alassa,
Ramenton douçamen li causo dóu passat,

Urous, tres fes urous l'ome que li chavano
De la vidasso laisson fort !
Se dins soun pitre n'es pas mort
Lou gréu verd afranqui de touto causo vano,
Aquéu s'enausso e vèi la santo Verita
Coume lou verbouisset vèi la Nativeta.

Joan Enric Fabre
Arrenjaments ortografics dau Caramentrant

<<< Retour à la tiero di pouèmo de J E Fabre