> Tourna escouta la musico Tiero di nouvè < Retour à la tiero di Nouvè

An coumpausa à soun entour
Uno bello musico ;
I'a pèr lou mens sèt o vue jour
Que chascun se i'aplico ;
Veici ço que an decida,
Souto peno d'èstre amenda.

Faudra parti tóutis ensèn
Pèr i'ana rèndre óumage,
Chascun prendra soun estrumen
Emé soun equipage,
En intrant faran coumplimen
À l'Enfant em'à la Jacènt.

Pèire jougara dóu vióuloun,
Soun son es agradable,
Pèr rejouï lou bèu Poupoun
Qu'es coucha dins l'estable ;
Jougara quàuquis èr nouvèu
À l'ounour dóu divin agnèu.

 Bernat jougara de l'auboues,
Soun armounìo encanto ;
Matiéu a uno bello voues
Qu'es tout-à-fait charmanto,
Cantara un poulit recit,
Segur charmara de l'ausi.

Faudra faire jouga Laurèn
Dessus la fluto douço ;
Se fau un acoumpagnamen,
Avèn uno ressourço
Qu'es la basso de Jan-Vincèn,
Dison que n'en jogo fort bèn.
Jaque pourtara soun bassoun
E sa basso de violo
Ignàci soun salterioun,
L'armounìo es fort drolo ;
M'an di que lou pichot Charloun
Jogo fort bèn dóu timpanoun.

Jan-Toumas qu'a lou goust fort fin,
Toucara l'espineto,
E quand saren vers lou Daufin
Nòsti quatre troumpeto
Sounaran quàuqui poulits èr,
Pièi coumençara lou councert.

N'adurren pas ges de serpènt,
Soun son es esfraiable,
Farié trop pòu à l'Innoucènt
Qu'es coucha dins l'estable,
Maudit serpènt, sot animau,
Siés la causo de nòsti mau.

Dins lou tèms que musicavian,
Intrè sèt o vue pastre
Adourèron aquel Enfant
Plus brihant que lis astre ;
Se metèron de noste cor,
Fuguerian assès bèn d'acord.

Cristòu jougè dóu flajoulet,
Coulau de la museto,
Marc-Antòni dóu galoubet,
Alèssi di clincleto,
Louis emé soun tambourin
Cresiéu qu'aguèsse jamai fin.
     


Èro mai de dos ouro un quart
Que jougavon encaro ;
N'ausiguère un gros gaiard
Touca de la quitarro.
Un autre emé soun calamèu
Fasié un efèt di plus bèu.