L' aprendissage lousable de la lengo d'O pèr l'escri se capito insufisènt se s'acoumpagno pas emé l'ouralita.

Adounc, èro de prèisso de mounta uno estruturo mouderno, à mand de sousta la memòri fins de la restituï i generacioun venènto.

Uno lengo, vièio de mille an, dóu passa istouri e literàri prestigious, pòu-ti èsse coundanado à l'óublit e s'esvani ?

Amor que creson soulide lou countràri, lou Felibrige, lou Mouvamen Parlaren e lou CREO-Prouvènço, emé lou sousten dóu Municipe de-z-Ais de Prouvènço, dóu Counsèu Regiounau e dóu Counsèu Generau di Bouco-dóu-Ròse, decidiguèron de crea lou COL'OC.

Aquesto realisacioun es l'ilustracioun dis iniciativo mandado enjusqu'aro pèr aquéli mouvamen em'uno ment federarello.

Lou COL'OC, respetuous de tóuti li varianto, se vòu lou catalisaire de tóuti li demando emai lou liame entre li divers atour de la culturo en Prouvènço e en deforo.

Soun estruturo inmoubiliero (160 m2), messo à sa dispousicioun pèr la Coumuno, soun endré (lou Pargue Jourdan à-z-Ais de Prouvènço) e la voio de si partenàri, soun li garantido de la reüssido dóu Cèntre d'Ouralita dins la capitalo istourico de Prouvènço : Ais de Prouvènço.